Skuleåret 2016/17 har vore rikt på hendingar for Forsand
skule. Eg byrja som innleidd skulefagansvarleg i august 2016 for å styrke den
skulefaglege kompetansen på kommunalt nivå. Som
alle skular har Forsand skule sine sterke og svake sider. Kommunestyret
har hatt eit sterkt ønske om å vidareutvikle ein god skule. Derfor vart det i
juni 2016 gjort vedtak om å setja i verk prosjektet «Den gode skulen i
Forsand».
Prosjektgruppa har særleg arbeidd med å styrka dialogen og
samarbeidet mellom alle partar i skulen, og spesielt heim-skule samarbeidet.
Det har blitt laga eiga plan for dette samarbeidet, som du nå kan finne på
skulen si heimeside.
Arbeidsperioden for prosjektgruppa er over, og gruppa har
lagt fram ein rapport til kommunestyret
med desse konklusjonane:
For å utvikle ein god skule på Forsand bør
ein:
- Styrkja
samarbeidet mellom partane i skulen gjennom gjensidig forplikting
- Utvikla
gode system for informasjonsfly
- Få på
plass overordna verksemdsplan og årlege handlingsplanar, lagt ut på
heimesida
- Leggja
vekt på godt tilpassa og variert undervisning der og elevane har medverknad
- I større
grad utvikla felles system, prosedyrar og praksis, lagt inn i skulen sitt
årshjul, tilgjengeleg på heimesida
- La
samarbeidsutvalet (SU) vera ein sentral arena for utviklingsarbeid, drift og
samhandling
- Skulen
må aktivt søkja samarbeid med andre skular
Heile rapporten frå prosjektgruppa
«Den gode skulen i Forsand» kan du finne her: Rapport Den gode skulen 2016-17.
I junimøta i Forsand kommunestyre og Sandnes bystyre vart
det vedteke ein samarbeidsavtale som inneber at Sandnes kommune blir
vertskommune for Forsand skule. Det er det orientert om i eiga sak på denne
heimesida.
Elles vil skulen frå hausten 2017 starta opp med ny
skuleleiing. Arbeidet med å finna ny rektor til skulen er godt i gang Så snart
det er klart kven det blir vil de finna informasjon om det på heimesida. Bjørn
Kenneth Høllesli er alt i gang som inspektør på skulen, og vil halda fram i den
jobben til hausten.
Eg vil takka alle tilsette for vel utført arbeid dette
skuleåret, FAU og foreldre for godt samarbeid og konstruktive innspel, og medlemmane
i prosjektgruppa for inspirerande samarbeid. Men mest av alt ein stor takk til
Ingunn Varhaug og Ingeborg Søyland som gjennom mange år har lagt ned stor
innsats for heile skulemiljøet i Forsand. Eg er imponert!
Eg ønskjer dykk alle ein fin sommarferie, og velkommen
tilbake til nytt spennande skuleår i 2017/18.
Ragnvald Riis
Skulefagansvarleg