No er det mørkt om morgonen. Pass på at du har refleks, og at sykkelen er i god stand og har lys slik han skal. Politiet kjem ein morgon vi minst anar det, og foretar kontroll!
Elevane i valfaget trafikk har i haust hatt kampanje for å auke bruken av sykkelhjelm. I denne årstida er bruk av hjelm ekstra viktig - sjølv om det ikkje er glatt overalt er det ofte glatte parti på skulevegen der elevar sklir og dett med sykkelen. Å slå hovudet då kan vere svært alvorleg.
Bruk av lys på sykkel er påbudt, og viss du blir stoppa av politiet utan rett lys, kan du få ei bot på 900,- per lys du manglar. Dette vil svi på julegavebudsjettet. Pass på at sykkelen er i god stand, har bremser som fungerer, refleks og lys. Det blir tryggare for deg, for alle andre i trafikken og du risikerer ikkje bot.
Skulen har dialog med politiet om kontrollar på skuleområdet før skulestart om morgonen. Dette kan difor skje når som helst i tida fram mot jul. Betre å vere godt førebudd enn å få bot! Og, ikkje minst, det er tryggare for deg og alle rundt deg.