Endå eit skuleår er over. Eit år som har
gått svært fort, tykkjer mange av oss.
Samstundes ser me fram mot sommarferie med
glade og late dagar saman med familie og vener. Nokre skal langt av stad, medan
andre likar seg best rundt dørene heime.
Det har vore eit nytt hektisk og
innhaldsrikt år for oss på Rosseland skule. Skulen er i vekst, og me treng
difor stadig nye tilsette. Samstundes er det nokre tilsette som søkjer nye
utfordringar på ulike område. Me har difor brukt mykje tid på å få tak i nye
gode lærarar. Me meiner at me har vore svært heldige med dei nye me har fått
tilsett. Dei tilfører skulen viktig og oppdatert kompetanse!
Rosseland er ein flott skule - på mange måtar. Kjekke og interesserte
elevar, eit personale som gjer alt dei kan for at kvaliteten på skulen skal bli
best mogleg – og engasjerte foreldre.
Dette skuleåret har me halde fram med
hurtigare bokstavinnlæring i den grunnleggande lese – og skriveopplæringa på
1.trinn. Den digitale satsinga i kommunen held fram. Frå hausten 2017 vil alle
elevar på 1.-5.trinn ha kvar sin iPad som læringsverktøy. Frå hausten 2018 vil
alle elevane i kommunen vera innrullert i satsinga. Dette forpliktar oss til å
driva kontinuerleg skuleutvikling. Undervisninga må endrast, slik at dei
digitale verktøya blir brukt på ein slik måte at kvar elev i større grad kan få
tilpassa opplæring, og dermed kan ta ut meir av læringspotensialet sitt.
I løpet av september vil me få klart
«Familiealbumet» vårt – den nye skulekatalogen
– der det vil vera bilete av alle klassar, elevar og tilsette. Bileta av elevane som går her i år er allereie
tatt. Dei
nye 1. klassingane frå hausten har vore på besøk og møtt lærarane sine. Både
elevar og lærarar gler seg til hausten. Det er 83 nye 1. klassingar, som blir
delte i 4 klassar. Elevane på 1.trinn skal fotograferast 22.08.2017.
Neste skuleår vil
det vera 560 elevar ved skulen. Det betyr som de veit at me har vokst ut av det
flotte bygget vårt. 7.trinn må ha sine klasserom i Timehallen. I løpet av
skuleåret 2017-18 vil bygget til «gamle» Time vidaregåande bli pussa opp, for å
vera klar til både 6. og 7.trinn frå hausten 2018. FAU har engasjert seg for å
oppgradera uteområdet mellom bygga, slik at det blir eit heilheitleg område,
som kan invitera barn og vaksne til ulike aktivitetar.
Eg vil gratulera
jentene og gutane på skulelaga våre i fotball med framifrå innsats også dette året. Gutane
gjekk heilt til finalen, og for første gong i historia kunne dei løfta pokalen,
og smykka seg med tittelen «Rogalands beste skole», som det stod i Jærbladet
21.06. Dette lovar godt for rekrutteringa av fotballspelarar på Bryne framover!
Torsdag 22. juni er siste skuledagen.
Elevane møter til vanleg tid og sluttar kl.12.00. Det blir «Syng med oss» i
aulaen kl. 08.45, der 1.trinn har
ansvaret. Etter samlinga går dagen slik dei ulike trinna har sett opp. Elevane kan ha
med seg max 0,5 l brus/drikke og kjeks/kaker/ekstra god matpakke.
Til slutt vil eg ønskja dykk alle ein god
og minnerik sommarferie!
Helsing
Geir – rektor