Urfolksveke
Denne veka har me hatt urfolksveke på skulen, frå måndag til torsdag. Me gjekk bort frå den vanlege timeplanen og delte elevane på tvers av trinna i åtte grupper. Alle grupper rullerte gjennom åtte ulike økter der dei fekk lære om urfolk på ein variert og praktisk måte.
Publisert: 06.02.2026 13:54 Sist endra: aldri Forfattar: Hege Jonathanson
Elevane fekk mellom anna prøve seg på joik i musikk, arbeide med oppdrag i Sametinget gjennom Minecraft, og delta i ei spennande naturløype i utegruppa. På kjøkkenet laga dei den samiske reinsdyrgryta Bidos, i gymsalen løyste dei oppgåver i eit stort escaperoom, og på verkstaden fekk dei lage duodji‑inspirerte produkt. Ei av gruppene arbeidde også med historie, fornorsking og korleis urfolk har vore påverka gjennom tidene.
Det har vore ei lærerik og engasjerande veke der elevane har vore motiverte, nysgjerrige og samarbeidd fint på tvers av trinna. Me står igjen med mange gode opplevingar – og litt meir kunnskap om kulturar som er viktige å verne om.