Det vart eit jamnt og hardt oppgjer mellom lærarane og sjuandeklassingane onsdag. Elevane leia lenge, men etter to mål seint i 2. omgang, vann lærarane til slutt 9-7.
Vårens fotballkamp mellom elevane i 7. klasse og lærarane vart spela i ballbingen på skulen. Rundt bana stod resten av skuleelevane og heia - dei fleste på elevane.
Elevane leia 4-3 til pause, og tidleg i 2. omgang gjekk dei opp til 6-3. Det såg lenge ut til at dei skulle dra sigeren i land.
Men lærarane gav aldri opp, og reduserte jamt og trutt. Lenge stod det 7-7, før lærarane putta på to kjappe mål. Og når dommaren blåste i fløyta, kunne lærarane sleppa jubelen laus. For det er lenge sidan det har vore eit så jamnt oppgjer i vårens store fotballkamp.