Nye førsteklassingar på Orre skule

14. august var første skuledag for 21 spente 1.klassingar, og to minst like spente lærarar.

Norske flagg og raud laupar var klare til å ta i mot den fine gjengen som me er så heldige å får låna i sju heile år på Orre skule. Rektor ønska elevar og foreldre velkomne, og før me entra klasserommet fekk me foreviga eit bilete av dei skuleklare førsteklassingane som stråla med fine førsteklasse-klede og ny skulesekk.

Dei første dagane har me sunge, leika og brukt tid på å skapa relasjonar, samt verta trygge på den nye kvardagen. Me har allereie rukke å lært oss fire bokstavar. Desse har me har skrive, teikna, forma i kitt og bygd i lego.

Me har lært oss omgrepa «høgast, lågast, færre og flest» i matematikk og har byrja å snuse på pluss og addisjon. Stasjonsundervisning er favoritten til både born og vaksne, og her klarer me også å bevara den gode leiken, som me veit er eit veldig viktig element i kvardagen til dei yngste elevane.

Temaet vennskap står i fokus fram til haustferien på alle trinn. Me syng songar og deler forteljingar som gir elevane både inspirasjon til å få nye vener samt verktøy til å ta vare på dei. Det er verdifullt at me kan arbeide med dette på tvers av trinna.

Når ein er 1.klassing, er ein så heldig at ein får ein fadder frå 5.trinn. Andre skuledag fekk elevane helsa på sin fadder. 5.klassingane hadde skrive brev til sitt fadderbarn, og fekk stolt dela dette ut i klasserommet. Etterpå var det tid for arbeidshefte, og fadderane var kjempegode til å rettleia dei nye førsteklassingane. Faddearbeidet skal me halda fram med ein gong i månaden resten av 1.trinn 😊

Me har også fått vore på tur med fjorårets 1.klassingar. Desse har no vorte stolte 2.klassingar, og har mykje god erfaring å gje dei nye elevane våre. Dei to førre onsdagane har me øva oss på å vera gode trafikantar og har gått på fine tur - rekkjer til friområdet. Der har me blant anna laga kvepsefeller med gjær, sukker, vatn og zalo. Me måtte testa det ut heile to gonger, og siste gong vart det brak-suksess med mange kvepsar i fellene.

Me ser skikkeleg fram til dette skuleåret, og elevane er allereie godt i rute med rutiner, leik og læring. Ein skikkeleg lærevilleg og god gjeng.

Me gler oss til fortsetjinga 😊

Med vennlig helsing stolte lærarar:
Tonje Skaugrud
Maria K. Hegelstad