Ekskursjon til Bergen
Torsdag 2. juni var det endeleg tid for ein ekskursjon for 10. trinn og vi sette kurs mot Bergen.
Publisert: 09.06.2022 00:37 Sist endra: aldri Forfattar: Maria Strand Helle
Fyrste stopp var Gestapomuseet i Veiten. Her fekk vi fyrst innføring i noko av det som føregjekk i huset gjennom historia til Terje som sjølv var 15 år, omtrent som tiandeklassingane sjølve, då han vart forhørt av Gestapo i Veiten. Deretter var det eit oppdrag som skulle løystast; Er det mogleg å sjå på nokon om dei er «terroristar»/ «motstandsfolk», gestapistar og krigsforbrytarar utifrå arrestasjonsfoto eller må det fleire ledetrådar til? Det var sjølvsagt også tid til å sjå seg om i sjølve museet, m.a. ventecellene fangane sat i her medan dei venta på å verte avhøyrte og det som verre var. Interessant og lærerikt var stikkord som gjekk igjen hjå mange då elevane evaluerte besøket i etterkant. Etter Gestapomuseet vandra vi til VilVite, der vi vi faktisk fekk ete nistepakkane våre i opphaldsvêr utanfor før det var tid for å sjå seg om inne i Vitensenteret. Mange hadde vore der fleire gongar før og følte dei hadde prøvd/ sett det meste frå før, medan andre koste seg meir. Ein veldig kjekk gjeng å ha med på tur var det uansett! No er det berre siste innspurt så er Samnanger ungdomsskule historie for denne flotte flokken også!