Torsdag morgon gjekk turen med fly til Oslo, og rett etter landing bar det til Stortinget. Elevane måtte gjennom sikkerheitskontroll før dei møtte guiden som tok oss med på ei spennande omvising. Me var heldige og fekk sitje på galleriet i stortingssalen og sjå partileiarane i arbeid. Det var ei oppleving som gjorde inntrykk! Me gjekk også gjennom den berømte tunnelen under bakken frå nabobygget og inn i Stortinget.
Etter besøket sjekka me inn på Thon Hotel, som ligg like ved Stortinget. Her fekk elevane slappe av mellom øktene. Torsdag ettermiddag vart det tid til å utforske Karl Johan, og fleire nytta høvet til litt shopping.
Fredag starta med frukost før turen gjekk til 22. juli-senteret. Her deltok elevane i undervisningsopplegget Samtalen om 22. juli, der dei reflekterte rundt tema som ekstremisme, demokrati og politikk. Dei fekk sjå gjenstandar frå den grufulle dagen, lese beretningar frå overlevande og lære om korleis samfunnet jobbar for å hindre liknande hendingar. Etterpå tok me ein runde i regjeringskvartalet og gjekk vidare opp til Slottet.
Heimreisa gjekk med tog over fjellet – ein lang, men fin tur. Elevane fekk med seg mykje kunnskap, gode opplevingar og ikkje minst samhald. Dette vart ein tur dei kjem til å hugse lenge!